ГОМЕЛЬСКІ МАЛАДЗЁЖНЫ ТЭАТР - У ВІЦЕБСКУ

На пачатку новага сезону на сцэне тэатра імя Якуба Коласа – чарговыя гастролі. 10 і 11 верасня са сваімі пастаноўкамі ў Віцебск завітае Гомельскі гарадскі маладзёжны тэатр, каб падзяліцца творчасцю з дарослымі і дзецьмі.

«Геркулес… Пяты подзвіг» – спектакль па п’есе знакамітага швейцарскага драматурга, лаўрэата Нобелеўскай прэміі Фрыдрыха Дзюрэнмата. У трагікамедыі легендарны герой паўстае перад гледачамі простым смяротным са сваімі надзённымі праблемамі, якія ён спрабуе вырашыць. Геракл імкнецца пераадолець бюракратычную сцяну і замоцную звычку людзей «жыць, як жывецца». Але ці здолее? На гэтае пытанне спрабуюць адказаць гомельскія артысты.

Вудзі Ален добра вядомы аматарам кінамастацтва як цудоўны рэжысёр. Але ён быў яшчэ і драматургам. Менавіта паводле яго п’есу камедыя, якую пакажа ў Віцебску трупа Гомельскага маладзёжнага тэатра, - «Сыграй яшчэ раз, Сэм». Хто дапаможа, калі ад добрага чалавека сышла жонка, фантазіі і ўяўленні пераўтвараюцца ў рэальнасць і пачынаюць вучыць жыццю, і ўжо здаецца, што едзеш з глузду? Вядома, выратуюць і прыйдуць на дапамогу самыя блізкі сябры. І пераможа дабрыня.

А для самых юных віцебскіх гледачоў гомельскія артысты падрыхтавалі спектакль па матывах знакамітай казкі французскага пісьменніка Шарля Перо «Кот у ботах». Ужо 300 год расказваюць гэтую добрую і мудрую гісторыю бацькі сваім дзецям. І яна да гэтага часу не губляе актуальнасці.

Прыходзьце на спектаклі! Сачыце за афішай Нацыянальнага акадэмічнага драматычнага тэатра імя Якуба Коласа!