«ЗАЛАТЫ КЛЮЧЫК» - НАВАГОДНЯЯ КАЗКА Ў КОЛАСАЎСКІМ ТЭАТРЫ

У снежні Нацыянальны акадэмічны драматычны тэатр імя Якуба Коласа запрашае юных гледачоў і іх бацькоў на казку «ЗАЛАТЫ КЛЮЧЫК» па п’есе Аляксея Талстога.

Казку аб прыгодах Бураціна ведаюць многія пакаленні. Паводле гісторыі італьянскага пісьменніка Карла Калодзі, у 1936 годзе Аляксей Талстой напісаў сваю аповесць, а потым і п’есу пра Бураціна. Гэты персанаж і сёння з’яўляецца адным з любімых дзіцячых герояў.

Шматлікія выпрабаванні чакаюць драўлянага хлопчыка - гарэзлівага, смелага і вельмі-вельмі добрага. Зацікаўлена ідучы па жыццёвай дарозе, Бураціна сустрэнецца з Карабасам і Дурэмарам, Лісой Алісай і катом Базіліа. Ён будзе вучыцца адрозніваць дабро ад зла, стане верным сябрам і абаронцам для Мальвіны, П’еро і для таты Карла. І канешне, трымаючы ў руках залаты ключык ад мудрай чарапахі Тарцілы, Бураціна абавязкова знойдзе таемныя дзверы. А за імі – невядомы чароўны скарб!

Коласаўскі тэатр запрашае самых юных гледачоў прайсці ўсе прыгоды разам з героямі «Залатога ключыка», а дарослых – яшчэ раз успомніць светлыя хвіліны дзяцінства.

Ролі выконваюць: Аляксей Анісеня / Яўген Бераснеў (Бураціна), Ксенія Камінская / Алёна Чыстабаева (Мальвіна), Ілля Блыкін / Дзмітрый Каваленка (П’еро), Цімур Жусупаў / Дзмітрый Філімоненкаў (Артэмон), заслужаны артыст Рэспублікі Беларусь Вячаслаў Грушоў / Пятро Ламан (Карла), Міхаіл Асанаў / Раман Волат (Карабас Барабас), Генадзь Гайдук / заслужаны артыст Рэспублікі Беларусь Георгій Лойка (Дурамар), Святлана Сухадолава / Алена Шарэпчанка (Ліса Аліса), Антон Бараноўскі / Юрась Цвірка (Кот Базіліа), Уладзіслаў Жураўлёў (Цвыркун), заслужаная артыстка Рэспублікі Беларусь Галіна Букаціна / Раіса Грыбовіч (Чарапаха Тарціла), Таццяна Рогат / Дар’я Французава (Жабка).

Пасля кожнага паказу спектакля «Залаты ключык» для гледачоў адбудзецца навагодняе прадстаўленне каля ёлкі.

Узроставае абмежаванне - 0+.

Квіткі - у касе тэатра (тэлефон 62-63-81) і на сайце kvitki.by:
22 снежня (пятніца), 18:00
23 снежня (субота), 17:30
24 снежня (нядзеля), 11:00
24 снежня (нядзеля), 17:30
25 снежня (панядзелак), 11:00
25 снежня (панядзелак), 14:30
28 снежня (чацвер), 18:00
29 снежня (пятніца), 18:00
30 снежня (субота), 11:00

Адзначайце навагоднія святы разам з Коласаўскім тэатрам!